Það styttist og styttist í komandi tímabil í Olís-deildum karla og kvenna. Olís-deild karla hefst fimmtudaginn 3.september á meðan Olís-deild kvenna hefst laugardaginn 5.september.

Handkastið heldur áfram að hita upp fyrir Olís-deildirnar og hefur sent sömu tíu spurningarnar á alla þjálfara deildarinnar í karla og kvenna flokki.

Nú er komið að því að sjá hvað þjálfari Hauka í Olís-deild kvenna Stefán Arnarson hefur að segja.

Ertu ánægð/ur með hvernig undirbúningstímabilið hefur gengið?

Undirbúningstímabilið hefur gengið ágætlega. Liðið fór á mót í Noregi þar sem það spilaði þrjá leiki. Það var margt jákvætt í leik liðsins, en einnig margt sem við þurfum að bæta.

Hverjar voru áherslur liðsins á undirbúningstímabilinu?

Áherslan hefur verið á að tvinna nýja og eldri leikmenn saman. Við höfum misst góða leikmenn, en á móti fengið sterka leikmenn í staðinn. Áherslan snýst fyrst og fremst um að allir haldi takti og að skipulag liðsins sé í lagi.

Hvernig er staðan á leikmannahópnum rétt fyrir mót?

Staðan á leikmannahópnum er góð, fyrir utan Rakel. Þessar endalausu Herjólfsferðir eru greinilega ekki að fara vel með hana!

Hvernig metur þú þær mannabreytingar sem hafa orðið á liðinu í sumar?

Við höfum misst öfluga einstaklinga. Díana fór í heimahagana, Inga Dís og Thelma eru að reyna að bæta sig í dönsku, Birta Líf er að hjúkra þjóðinni, Elísa fór í Breiðholtið og Ragnheiður Ragnarsdóttir er að gera Ísland sterkara. Síðan lagði Ragnheiður Sveinsdóttir skóna á hilluna.

Á móti höfum við fengið góða leikmenn í staðinn, en tíminn mun skera úr um hvernig þær munu standa sig.

Hverjar telur þú vera helstu áskoranir þínar og liðsins í vetur?

Að vera betri í dag en í gær.

Hverjar eru væntingar þínar til tímabilsins?

Að liðið spili skemmtilegan handbolta og átti sig á því að það þarf að leggja inn á Gleðibankann. Einnig að liðið læri af reynslu ICY-hópsins sem keppti fyrir Íslands hönd í Eurovision árið 1986.

Hverju ert þú spennt/astur fyrir á tímabilinu?

Að sjá Ásrúnu Ingu Arnardóttur aftur á vellinum eftir slæm meiðsli.

Ef þú mættir velja þér einn leikmann úr öðru liði í deildinni til að fá í þitt lið – hver væri það og af hverju?

Anna María Aðalsteinsdóttir ÍR. Hún getur spilað margar stöður og skilar þeim öllum vel.

Ef þú mættir breyta einni reglu í handboltanum – hver yrði breytingin?

Að fara í spor körfuboltans þannig að þjálfari geti sent dómara í VAR eða „Spiideo“ einu sinni í leik.

Hvaða lið telur þú að verði deildarmeistari í vetur?

Sem betur fer eru mörg lið sem koma til greina. Ég held að deildin verði mun jafnari en hún hefur verið undanfarin ár. Valur er með hefðina, ÍBV er það lið sem flestir spá sigri, Fram er með stóran og öflugan hóp og síðan eru mörg lið með öfluga þjálfara og skemmtilega leikmenn sem geta komið á óvart.