Freyr Aronsson sleppur við leikbann og getur leikið með íslenska U18 ára landsliðinu gegn Frakklandi í dag klukkan 15:00. Bæði Ísland og Frakkland töpuðu í 8-liða úrslitum og leika þjóðirnar því um 5.-8.sætið á mótinu.

Þá slapp Logi Finnsson einnig við leikbann en bæði Freyr og Logi fengu að líta rauða spjaldið í leiknum gegn Þjóðverjum í gær. HSÍ þurfti að senda frá sér greinargerð vegna máls Loga en þetta staðfesti Andri Sigfússon þjálfari U18 ára landsliðsins í samtali við Handkastið í morgun.

Ísland tapaði gegn Þýskalandi í gær með tveimur mörkum 33-31 en liðið var undir nær allan leikinn. Frakkland tapaði á sama tíma gegn Spánverjum 29-27 en það sama var upp á teningnum þar, þar sem Spánverjar leiddu nær allan leikinn.

Króatía og Ungverjaland mætast í hinum leiknum um 5.-8.sætið en Ísland hefur mætt báðum þjóðunum á mótinu hingað til og unnu leikina báða nokkuð sannfærandi.

Í undanúrslitum mætast Þýskaland og Spánn og Danmörk og Slóvenía hinsvegar.

Fréttin hefur verið uppfærð:
Eftir að HSÍ sendi frá sé greinargerð varðandi rauða spjaldið sem Logi Finnsson fékk gegn Þjóðverjum í gær, hefur EHF staðfest að hann fær ekki leikbann og getur því leikið gegn Frakklandi í dag.