Handboltahöllin sem var öll mánudagskvöld í opinni dagskrá á Sjónvarpi Símans á síðustu leiktíð hefur nú verið færð yfir á sunnudagskvöld og hefst klukkan 19:30. Þetta var kynnt á blaðamanna- og kynningarfundi Olís- og Grill 66-deildanna á Hlíðarenda fyrir helgi.

Handboltahöllin færist til á dagskránni í vetur og verður sýnd klukkan 19:30 á sunnudagskvöldum, strax að loknum leik umferðarinnar.

Í tilkynningunni frá HSÍ segir að nýja tímasetningin sé engin tilviljun. "Leikur umferðarinnar" verður alltaf klukkan 18:00 á sunnudögum í opinni dagskrá og Handboltahöllin tekur við beint í kjölfarið í Sjónvarpi Símans og á Livey.

,,Þar með rennur sunnudagurinn saman í eina samfellda handboltadagskrá, leikur í beinni og svo uppgjör vikunnar meðan úrslitin eru enn heit," segir í tilkynningunni frá HSÍ. Hörður Magnússon stýrir áfram skútunni en tveir nýir sérfræðingar bætast við hópinn.

Sérfræðingahópurinn telur sex manns:

Ásbjörn Friðriksson

Einar Ingi Hrafnsson

Hildigunnur Einarsdóttir (ný)

Hrafnhildur Ósk Skúladóttir (ný)

Rakel Dögg Bragadóttir

Vignir Stefánsson

,,Hópurinn er þannig samsettur að reynsla úr bæði kvenna- og karlaboltanum er til staðar við borðið, sem skiptir máli þegar umfjöllunin á að ná yfir báðar Olísdeildirnar jafnt. Þá verður sú nýjung í þættinum að Daníel Franz Davíðsson skyggnist bakvið tjöldin í handboltaheiminum með innslögum sem ná því sem kemst ekki til skila í hefðbundinni leikjaumfjöllun."

Olís-deild karla hefst 3. september og fyrsti þáttur Handboltahallarinnar fer í loftið sunnudaginn 6. september, klukkan 19:30.