Það styttist og styttist í komandi tímabil í Olís-deildum karla og kvenna. Olís-deild karla hefst fimmtudaginn 3.september á meðan Olís-deild kvenna hefst laugardaginn 5.september.

Handkastið heldur áfram að hita upp fyrir Olís-deildirnar og hefur sent sömu tíu spurningarnar á alla þjálfara deildarinnar í karla og kvenna flokki.

Nú er komið að því að sjá hvað þjálfari Vals í Olís-deild karla Ágúst Jóhannsson hefur að segja.

Ertu ánægð/ur með hvernig undirbúningstímabilið hefur gengið?
Já nokkuð sáttur. Fór rólega af stað en höfum verið að mjaka þessu í rétta átt og verðum vonandi ferskir í upphafi móts.

Hverjar voru áherslur liðsins á undirbúningstímabilinu?
Bara nokkuð venjulegt, styrkur, þol og tækni fyrri hlutann og svo sl. vikur meiri áhersla á samspil í vörn sem sókn. 

Hvernig er staðan á leikmannahópnum rétt fyrir mót?
Góð - allir heilir og allir léttir.

Hvernig metur þú þær mannabreytingar sem hafa orðið á liðinu í sumar?
Það á eftir að koma í ljós. Fengum fjóra fína leikmenn en misstum líka sex reynda og góða leikmenn. En erum um leið með marga unga stráka fyrir sem fá meiri tækifæri.

Hverjar telur þú vera helstu áskoranir þínar og liðsins í vetur?
Erfitt að segja en við verðum sér í lagi til áramóta að spila mikið af leikjum og verður spennandi að sjá hvernig við sem lið höndlum það. Spennandi og gaman að spila mikið en um leið mjög krefjandi.

Hverjar eru væntingar þínar til tímabilsins?
Bara sem fyrr háar en um leið með báðar fætur á jörðinni. Erum með töluvert breitt lið frá því í fyrra og getur tekið okkur smá tíma að slípa okkur saman. En við stefnum á að vera í toppbaráttunni líkt og undanfarin ár.

Hverju ert þú spennt/astur fyrir tímabilinu?
Að sjá strákana mína í Evrópudeildinni þar sem þeir munu mæta sterkum liðum frá Danmörku, Slóveníu og Ungverjalandi. Alltaf spennandi að máta sig við erlend atvinnumannalið.

Ef þú mættir velja þér einn leikmann úr öðru liði í deildinni til að fá í þitt lið - Hver væri það og afhverju?
Leonard í FH, við erum að vinna saman og væri ágætt að komast hjá því að hann sé að laumast í tölvuna hjá mér í XPS-inn á leikdögum á meðan ég bregði mér frá.  

Ef þú mættir breyta einni reglu í handboltanum - Hver yrði breytingin?
Að það megi bara einn standa. Alveg magnað að það sé oft á tíðum aðal málið hjá dómurum og eftirlitinu. Að öðru leiti er ég bara léttur!

Hvaða lið telur þú að verði deildarmeistari í vetur? 
Þetta lítur vel út hjá Bankastjóranum og co á Ásvöllum. Tippa því á Hauka.