Þrír leikmenn sem voru í litlu hlutverki hjá KA í Olís-deild karla á síðustu leiktíð verða ekki með liðinu á komandi tímabili. Þetta staðfesti Andri Snær Stefánsson þjálfari KA í viðtali við Handkastið.

KA hefur leik í Olís-deild karla á fimmtudaginn þegar liðið mætir HK í Kórnum í opnunarleik Olís-deildarinnar.

Um er að ræða þá, Ara Val Atlason, markvörðinn, Guðmund Imsland og Leó Friðriksson. Ari Valur flutti norður á miðju tímabili í fyrra og gekk í raðir KA en er nú fluttur aftur suður. Þá sagði Andri Snær að Guðmundur Imsal og Leó væru hættir.

,,Við lánuðum síðan Aron Daða Stefánsson í ÍR, sem er gott þroska tækifæri fyrir hann að prófa að fara suður og fá leikreynslu," sagði Andri Snær einnig.

Andri fór einnig fyrir stöðuna á leikmannahópnum rétt fyrir mót en nokkrir leikmenn liðsins eru að glíma við meiðsli og verða ekki klárir þegar Olís-deildin fer af stað.

,,Daði Jónsson fyrirliði er enn meiddur eftir hásinaslit en það styttist í hann. Giorgi fór í aðgerð í síðustu viku en við reiknum með honum klárum eftir áramót. Úlfar og Eyþór eru á meiðslalistanum, minniháttar hjá Eyþóri en Úlfar er á leið í aðgerð og verður klár eftir áramót," sagði Andri Snær meðal annars.