Það styttist og styttist í komandi tímabil í Olís-deildum karla og kvenna. Olís-deild karla hefst fimmtudaginn 3.september á meðan Olís-deild kvenna hefst laugardaginn 5.september.

Handkastið heldur áfram að hita upp fyrir Olís-deildirnar og hefur sent sömu tíu spurningarnar á alla þjálfara deildarinnar í karla og kvenna flokki.

Nú er komið að því að sjá hvað þjálfari Fram í Olís-deild karla Einar Jónsson hefur að segja.

Ertu ánægð/ur með hvernig undirbúningstímabilið hefur gengið?

Ég er mjög ánægður. Við höfum æft vel, fórum í frábæra æfingaferð til Tenerife og flest allir leikmenn nokkuð heilir.

Hverjar voru áherslur liðsins á undirbúningstímabilinu?

Þær eru nokkuð hefðbundnar. Þol - styrkur - snerpa. Stilla saman strengi. Svo allir tengi. 

Hvernig er staðan á leikmannahópnum rétt fyrir mót?

Staðan er nokkuð góð. Flestir heilir fyrir utan smá hnjask hér og þar. 

Hvernig metur þú þær mannabreytingar sem hafa orðið á liðinu í sumar?

Ég er mjög sáttur við þær breytingar sem hafa átt sér stað á leikmanna hópnum.

Hverjar telur þú vera helstu áskoranir þínar og liðsins í vetur?

Það verða fullt af áskorunum í vetur. Það verður sennilega helsta áskorunin hvernig við tökumst á við þær hverju sinni. 

Hverjar eru væntingar þínar til tímabilsins?

Að vinna alla titla sem eru í boði. 

Hverju ert þú spennt/astur fyrir tímabilinu?

Hvort Maggi Öder nái að spila alla leiki. Honum hefur aldrei tekist það á ferlinum. 

Ef þú mættir velja þér einn leikmann úr öðru liði í deildinni til að fá í þitt lið - Hver væri það og afhverju?

Róbert Aron Hostert langar að sjá hann kveðja ferilinn með titli hjá uppeldisfélaginu. Þetta kom til mín í draumi um daginn.   

Ef þú mættir breyta einni reglu í handboltanum - Hver yrði breytingin?

Hætta með miðju. Miðja í handbolta er mesta steypa sem ég veit um. 

Hvaða lið telur þú að verði deildarmeistari í vetur? 

Skandall ef Valur vinnur þetta ekki. Lang dýrasta lið landsins.